யார் தலையை ? யார் வாங்குவது ??

“  பாரத் மாதா கி ஜெய் சொல்லாதவர்களின் தலையை வெட்டுவோம்
                                                  – யோகா குரு ராம்தேவ்.”      

                                                                                  - தி இந்து , ஏப்ரல் 6 , 2016

“ தலித்துக்களுக்கு கோயிலில் அனுமதி மறுப்பு

கர்நாடக மாநிலம் ஹாசன் மாவட்டம் ஹொலெநர்சிப்பூர் , சிகாரனகள்ளி  கிராமம், பசவேஸ்வரா கோயிலுக்குள் தலித் மக்கள் நுழைய ஆதிக்கச்சக்திகள் கடும் எதிர்ப்பு  “.                                     - தி இந்து , ஏப்ரல் 6, 2016                                          

                       

பாரதமாதாவின் சாதி இந்துக்கள் தலித்துகளை பாரதமாதாவின் பிள்ளைகளாய் ஏற்க மாட்டார்களாம்.

தலித்துகளாய் மட்டும் தான் அவர்களை , தீண்டாமை / EVIL -   ஆக மட்டும்தான்  பார்ப்பார்களாம்.

நீங்களோ யோக குரு . இப்போது பாரதமாதாவின் புதல்வர்களை இழித்து / ஒதுக்கி நாசகாரமான வெறுப்பை உமிழ்ந்து , மனிதாபிமானமற்ற முறையில் பாரத புதல்வர்களை ஒதுக்குகிறார்களே ! ;

ஒதுக்கப்பட்ட, விலக்கப்பட்ட பாரதமாதாவின் புதல்வர்களை தலித் என்று சொல்லி வன்கொடுமை புரியும் அந்த வல்லாண்மை சாதியினரை ; பாரதமாதாவின் புதல்வர்களாயினும் அவர்களை என்ன செய்வீர்கள் ? என்ன தண்டனை ?

பாரதமாதா தம் புதல்வர்களிடையே சமத்துவமற்ற நெறி கடைபிடிக்கும் தாயா ?

அப்படியானால்..... ? தலித்துக்கள் என்று ஒதுக்கப்பட்டவர்கள் பாரதமாதாவிற்கு ஜே சொல்லமாட்டார்களே ? ( பின் யார் தலையை வாங்குவது? ).

நீங்கள் வெட்டப்போவது யார் தலையை ?

      நெறியற்று நடந்தால் ...................?.

க.செ

6-4-2016

எப்போது ? முடிவும் விடிவும்

“  இலங்கை கடற்படையினரால் தமிழக மீனவர்கள்  தாக்கப்படும் பிரச்சனைக்கு சமூக முடிவு காணும் வரை அந்நாட்டு மீனவர்களுக்கு இந்திய அரசு எவ்வித உதவியும் செய்யக்கூடாது என தி.மு.க. தலைவர் கருணாநிதி கோரிக்கை விடுத்துள்ளார் .”            - தி இந்து ஏப்ரல் 5, 2016.

இம்மாதிரியான கோரிக்கை முதல்முறையாக வரவில்லை.  பல வந்துவிட்டன.  பல வருடங்களாக வெளிவரும் மெகா தொடர்கதையில் இதுதான் முதல் ரேட்டில் உள்ளதை வாசக ரசிகர்களுக்கு (சிறிது ஞாபகம் இருந்தாலும்) நினைவுக்கு வந்துவிடும்.

இந்த கோரிக்கையில் ஒரு ஆச்சரியமான செய்தி உள்ளுறைந்துள்ளது. 

அதாவது, இலங்கை கடற்படை , இலங்கை அரசும் ; இலங்கை மீனவர்களும் சமமான அந்தஸ்து உள்ளவர்களாக , சமமானவர்களாக தெரிகிறது .

அதனால் தான் ...... “ பிரச்சனைக்கு சுமூக முடிவு காணும் வரை அந்நாட்டு (இலங்கை) மீனவர்களுக்கு இந்திய அரசு எவ்வித உதவியும் செய்யக்கூடாது  ”  என்கிறது அக்கோரிக்கை.

பழிக்குப் பழி , ரத்தத்திற்கு ரத்தம் .  அப்படித்தானே !  இது கலைஞர் வாக்கா ?  அல்லது தமிழ் கூறும் நல்லுலக வாக்கா ?? 

இலங்கை அரசின் கெடுமதியை , கொடுஞ்செயலை இந்திய நடுவன் அரசு ராஜ்ஜிய உறவு  (diplomacy ) என்னும் பெயரில் கண்டும் காணாமல் இருக்க ஏதுவான தேசிய இனமானம் தமிழன் தானே.  ஒரு பஞ்சாபி , ஒரு பீகாரி , ஒரு வங்காளி என்றால் கதை கந்தலாகி இருக்கும் ; இந்நேரம். 

மனிதாபிமானம் என்னும் பெயரில் தேடப்படும் குற்றவாளிகளுக்கே மன்னிப்பு (லலித்மோடி) கிடைப்பது மாதிரி, இலங்கை ராணுவத்திற்கும் ,அரசுக்கும் மன்னிப்பு வழங்குவது முடியாத காரியமா ? 

தமிழனுக்கு குச்சி ஐஸ் குல்பியை கையில் கொடுத்துவிட்டு , கச்சைதீவை இலங்கைக்கு தாரை வார்த்தபின் , தமிழக மீனவர்களுக்கு வாழ்வாதாரம் கேள்விக்குரியாகி வருகிறது .  எல்லை மீறலையும் “  பசி  ”  செய்யத்தானே செய்யும். 

இதற்கு படகை கைப்பற்றல் , திருப்பித் தருவதில்லை , மீனவர்கள் கைது , படகுகளை சேதப்படுத்துவது , எந்த சட்ட விதிகளுக்கும் உட்படுவது இல்லை  . 

தமிழக மீனவர்கள் என்றால் இலங்கை கடற்படைக்கு கிரிக்கெட் விளையாடுவது போல் .  எப்போதும் பேட்டிங்தான் .  தமிழக மீனவ உடல்கள்தான் கிரிக்கெட் பந்து .

பவுண்டரி என்றால் உடைந்த படகும் , குற்றுயிராக தமிழகம் வந்து சேரும் .  சிக்சர் என்றால் முழுப்படகும் தமிழனும் சிங்கள சிறைக்கு .

இப்படி தினமும் கிரிக்கெட் திருவிழாதான் இலங்கை ராணுவத்திற்கு .

இலங்கை இந்தியாவுக்கு அண்டை நாடு .

இந்த இருவருக்குமிடையில் உள்ள உறவில் மனித தன்னிலைகளின் குணாம்சம் என்ன வடிவில் இருக்கிறது ? ;  உறவு ஏற்கிறது ? ;  தகவமைக்கிறது   (acknowledgment ) ? பார்வையாளராக இருக்கிறது ? ;  பொறுப்புணர்வாக இருக்கிறது  ? இப்படி தனி மனித  / நாடுகளுக்கிடையிலான உறவுக்கிடையில் உள்ள நெறியை அறிய மன அலசலின் கேள்விதான் மேற்கூறியது .

இந்திய அரசு  L.T.T.E  -யை அடக்க , ஒழுங்குபடுத்த   IPKF - யை அனுப்பியது .  இலங்கை அதை அனுமதித்தது .

தமிழகத்தில் ராஜீவ் கொல்லப்பட்டபின் யாழ் தமிழருடன் , இந்திய அரசுக்கும் ; தமிழக மீனவர்களுடன் இலங்கை அரசுக்கும் ; மனத்தளவில் பகை அம்சம் கூடத்தானே செய்தது .

       L.T.T.E -யை ஒழித்துக்கட்ட இந்திய ராணுவம் மறைமுகமாவது தளவாடம் உட்பட உதவி செய்ததுதானே. 

இப்படி உறவுகளின் நெறி வேறு வேறாக இருக்கும் போது தமிழக மீனவர்களின் பிரச்சினையை யார் தீர்ப்பது ?

       தமிழக நடிகர்களை விட அரசியல் தலைவர்கள் வித்தகர்கள் .  தமிழக மீனவர் பிரச்சினை எப்படி தீரும் ?  யார் தீர்ப்பது ? 

       அலை எப்போது ஓயும் ?  தமிழக மீனவன் எப்போது மீன் பிடிப்பான் ? 

       என்று தமிழ் மனக் கடல் கொதிநீராகி , விளாவ பச்சை தண்ணீர் கிடைக்காத அந்த நேரத்தில் ஒரு வேளை சாத்தியமாகலாம் . 

       இனியாவது எல்லாவற்றையும் அதிகாரத்திற்கான ஓட்டாக கணக்கிட வேண்டாம் ! 

     இனியாவது அரசு , அரசியல் பற்றி பேசும் போது உறவு பற்றி பேசுவது ; உறவில் கடைப்பிடிக்கும் நெறிகளின் குணாம்சத்தை முதலில் வெளிப்படுத்துவோம்.

                                                                                                                                                                                     - க.செ

5-4-2016

இது போதவே போதாது

......” சமூக நீதிக்காகத்தான்  இட ஒதுக்கீட்டை அம்பேத்கர் கொண்டுவந்தார் ”...

( ஆம் உண்மைதான் ; ஆனால் நடப்பது ! )

       ......” இட ஒதுக்கீடு கொள்கையில் எந்த மாற்றமும் செய்யப்படாது என்பதை உறுதியாகச் சொல்லுகிறேன். இட ஒதுக்கீடு என்பது தலித் உள்ளிட்ட சமுதாயத்தில் பின் தங்கிய நிலையில் உள்ள மக்களின் உரிமை . அதை யாரும் பறிக்க முடியாது.

    .....நான் ஏற்கனவே கூறியதுபோல் அம்பேத்கரே மீண்டும் தோன்றினாலும் இட ஒதுக்கீட்டை பறிக்க முடியாது “ என்று அம்பேத்கர் நினைவிட அடிக்கல் நாட்டு விழாவில் பிரதமர் மோடி பேசினார் - தி இந்து , 22-3-2016 .

       பிரதமர் மோடியின் பேச்சில் கூர்ந்து நோக்கவேண்டியவைகள் (1) சமூக நீதிக்காகத்தான் ; (2) தலித் உள்ளிட்ட சமுதாயத்தில் பின் தங்கிய நிலையில் உள்ள மக்களின் உரிமை ; அதை யாரும் பறிக்க முடியாது .

       அதைப் பறிக்க யார் வருவது ? .

       அதை என்றும் காப்பாளனாகத்  தன்னை நனவிலியாக முன்னிறுத்துவதேன் ?

       “ அம்பேத்கர் மீண்டும் தோன்றி வந்தாலும் முடியாது ” என்ற கூற்றின் அடியில்  ஓடும் எண்ணம் என்ன ? இடஒதுக்கீட்டுக் காப்பாளன் “ நமோ “ ; அதாவது , குறிப்பாக கி.பி 2000 –ற்கான தலித்தின் நவீன காப்பாளர் “ நமோ “ என்பதாகிறது . நமோ இந்த நூற்றாண்டின் இட ஒதுக்கீட்டின் அடையாளமாகிறது. சற்று யோசித்தால் , நமோவின் இயங்கும் திசை அச்சமாக இருக்கிறது . இதை அறிய ஒரு அடிப்படையான கேள்வியைக் கேட்டுக்கொள்ளலாம் .

       நேருவின் இடத்தில் படேலை வைக்க எடுத்த அரசியல் நடவடிக்கையை நினைவு கூறும் நேரமிது ; இப்போது ‘ அம்பேத்கரே வந்தாலும் இட ஒதுக்கீட்டைத் தடுக்க முடியாது ‘ . ‘ நானிருக்கப் பயமேன் ‘ என நனவிலியாகக் கூறுகிறார் .

       இட ஒதுக்கீட்டில் எந்த மாற்றமும் வராது என்று உறுதியாகச் சொல்கிறது . இது மோடியின் தன்னிலையாகிறது . எது ? . இட ஒதுக்கீடு என்பது நிரந்தரம் / மாறாதது / அம்பேத்கர் திரும்பினாலும் மாற்ற முடியாது என்பது நனவிலியாகும் ஆசையாகும் . ஏன் இப்போது இவ்வளவு அக்கறை ?

       அம்பேத்கர் திரும்பினாலும் முடியாது என்பது கற்பனை ஒழுங்கு ( imaginary order ) .  சாத்தியமற்ற ஒன்றை ஏன் முன்னிறுத்த வேண்டும் ?

       ஒன்றுதான் நினைவிற்கு வருகிறது . காங்கிரசால் புறக்கணிக்கப்பட்ட படேல் , போஸ் ; இப்போது அம்பேத்கர் வருகிறார் .

       சமகால அரசியலில் , கலாச்சாரம் , மொழி சிம்பாலிக்காக ( symbolic ) ; மோடியின் நனவிலி ஆசை ( unconscious desire ) மேற்கூறிய சிம்பாலிக் அதிகாரத்தை ; படேல் , போஸ், அம்பேத்கர் போன்றோரின் வழித்தோன்றலாக ,  பாதுகாவலராக ; வரலாற்று நீடிப்பாக , தன்னை அடையாளப் படுத்துகிறார் மக்களிடம் .

                அவரின் நனவிலி ஆசையை அவரின் மனசுக்குள் சென்று அறிய வேண்டியதில்லை . அவரின் சொல்லாடல்களும் அதன் விளைவுகளும் (  effects ) ,  அதனை நடைமுறைப்படுத்தும் நினைவு விழாக்களும் , விளம்பரமும் ; தன்னை அவைகளுடன் நேரடியாக , மறைமுகமாக அடையாளப் படுத்திக்கொள்வதுதான் ( இன்றைய காவலனாக) அவரின் நனவிலி ஆசையின் உந்தலுக்கான சாட்சி . 
        இட ஒதுக்கீடு தனித்துவமானது ( entity )  அல்ல . அது சாதிய சமூகத்தின் பகுதி மட்டுமே . அதுவும் ஒரு இடைக்கால சரிசெய்தல் மட்டும்தான் .

       முழுமை என்பது சாதியம் . அந்தத் தீட்டை / Evil - ஐ  ஒழிக்க , குடியுரிமையை ( திருமணம் பண்ணும் உரிமையை ) நிலைநாட்ட , ஒரு சமூகப் புரட்சி தேவை / உண்மையான சமூக ஜனநாயகப் புரட்சி தேவை .

       அதை விடுத்து இந்தப் பாராளுமன்றத்தின் ஜனாதிபதி , முதல் மந்திரி , இட ஒதுக்கீடு , போன்றவற்றிற்கு உழைப்பது , பேசுவது , அதுவும் காத்திரமாக எழுதுவதும் இந்தப் பாராளுமன்ற ஜனநாயகம் காக்கத்தான் பயன்படும் . நடைபெறும் மாற்றமெல்லாம் பகுதியிலேதான் ; முழுமையில் அல்ல .   முழுமை இன்னும் வெகு தூரத்தில்.

       பாராளுமன்றமுறை நிரந்தரமாகக் கோலோச்ச சாதிய சமூகம் வேண்டும் .

      மனுவால் கட்டப்பட்ட சாதியம் அந்தந்த சாதிக்குரிய பாராளுமன்றவாதத்தால் நிரந்தரமான ஒதுக்கிடத்தில் ( Bay ) நங்கூரமிட்டு , சாதியம் நிற்கவைக்கப்பட்டுள்ளது .   அவ்வளவுதான் .

க.செ

தேசியவாதம் எதன் நலன் காக்க ?

             “  பிறரும் , பிறரின் சொல்லாடல்களும்,

                    தன்னிலையின் கட்டமைப்பிற்கு முக்கியத்துவமாக உள்ளது .

                   அது ஒரு சமூக அடையாளத்தை நிறுவுகிறது  ” - லெக்கான்

       புது டெல்லி . மார்ச்21. 2016- தி இந்து : 

       “ கருத்து சுதந்திரமும் தேசியவாதமும் இணைந்து இருக்க வேண்டியது அவசியம் ” 

                                                                       –  அருண் ஜெட்லி.

       யாருக்கு அவசியம் ? ஆளும் கட்சி , ஆளும் வர்க்கத்திற்குத்தானே ?

       இந்த சூத்திரம் , கல்வியாளர் , 70 வயது கல்புர்கியை சுட்டுக்கொன்றவர்களின் மனம் கவர்ந்த கட்சி ,  கருத்து எதுவோ ?

       அருண் ஜெட்லி அறியாததா.

       ஒரு டிராக்டர் கடனில் மிச்சம் இருந்ததால் போலீஸ் கூட்டணியோடு தமிழ்நாடு விவசாயியை அடித்து நொறுக்கியது யார் சுதந்திரம் ?

       சாராயக் கம்பெனி முதலாளி விஜய் மல்லையா கோடிகளில் கடனை வாங்கி விமான சர்வீஸ் நட்த்தி , பின்பு நல்ல விலை வந்தவுடன் விற்றுவிட்டு இங்கிலாந்தில் சுதந்திரமாக உலாவிவர மறைமுக உதவி / அனுமதி அளித்தது யார் ? மல்லையாவுக்கு உள்ள சுதந்திரம் , அதிகாரம் தஞ்சை விவசாயிக்கு இல்லையே !

       [ இன்னும் என்னென்ன அவமரியாதைகள் நடந்தாலும் விவசாயிகள் தங்கள் குறுங்குழுவாதம் , சாதிய மதர்ப்பு , ஆணவக் கொலைகளை கைவிட மாட்டார்கள் . அது தாராளவாதக் கருத்தாடல்களுக்கு மட்டுமல்ல ; ஏகத்துவத் தீவிரவாதத்திற்கும் உடன்பாடுதான் . உள்ளதெல்லாம்  நட்பு முரண்பாடே ] .

       கோடி கோடிகளில் ஊழல் பண்ணி ஓடி ஒளிந்திருக்கும் லலித் மோடிக்கு உதவிய அரச குலப் பெண்மணியும் , வெளியுறவு மந்திரி , “ மனிதாபிமான மந்திரி “ திருமதி  சுஸ்மாவும் லலித்திற்கு அளித்த சுதந்திரத்தை கடன் சுமையால் தற்கொலை பண்ணும் விவசாயிகளுக்கு பண்ணவில்லையே ஏன் ?

       சாதியத்தால் உயர் கல்விக் கூடங்களில் மாணவர்களின் தற்கொலைக்கு அருண் ஜெட்லி கூறும் கருத்து சுதந்திரம் உதவவில்லையே?

       இந்தியாவில் உள்ள சாதியம் இந்திய மக்களை ஒன்றிணையவிடாமல் வைத்துள்ளதே ? அதை ஜெட்லியின் “ கருத்து சுதந்திரமும் தேசியவாதமும் ” உதட்டளவிலான லிப்ஸ்டிக் சுதந்திரம் – காலையில் போட்டுவிட்டு பின் அழித்துக் கொள்ளும் தன்மை - தானே பேசுகிறது . எங்கே போயிற்று ஏகத்துவம் ?

       லலித் மோடியின் சொல்லாடல் அரசியலும் , சட்டவாதமும் ஒடுக்கப்பட்ட மக்களுக்கானதல்ல. குடியுரிமை கூட ( திருமணம் உட்பட ) இல்லாத தன்னிலைகளுக்கு, இதை இனியும் சகித்துக் கொள்ளக்கூடாது என்று சொல்வதைக் காட்டிலும் , உரிமைகளை வயித்துப் பிரச்சினையாய்க் காட்டி M L A ; M P ,  மந்திரி பதவிகளுக்கு ஆளாய் பறக்கிறார்கள் ; பரப்புரை செய்கிறார்கள் . என்ன செய்ய ?

       ஆதிக்க சாதிகளின் பலாத்காரமும் வெகு லாவகமாக நடந்து வருகிறது . அத்துடன் , நவீனத்துடன் மதம் , கலை , இலக்கியம் , கருத்தாடல்களிலும் சாதியத்தை மீட்டுருவாக்கும் சுதந்திரம் காக்கப்படுகிறது.

       ஜெட்லி இப்படிக் கூறுகிறார் :

       “ நம் நாட்டின் நம்பிக்கைகளையும் தத்துவங்களையும் தேசியவாதக் கொள்கைதான் வழிநடத்துகிறது  ” .

       இயற்கை வளங்கள் கொள்ளை போவதும் ; நவீன தொழில்மயம் , வல்லரசு ஆசை போன்றவற்றால் காலத்திற்கும் தீங்கு பயக்கும் அபாயத்தை – அணு உலை – நவீன வளர்ச்சி என்று கோடி கோடியாய் கொட்டுகிறதே ? .அதுதான் தேசியவாதக் கொள்கை வழிகாட்டியா ? அல்லது வேறயா ? பட்டியல் இடுங்கள் தெரிந்துகொள்கிறோம். இதைவிடுத்து ,

       “ நாட்டை சீரழிக்கும் அறைகூவலை அனுமதிக்க முடியாது...” ( மிரட்டல் வேண்டாம் ).    நல்லது கனம் மந்திரி அவர்களே.நாங்கள் உங்களுடன் கைகோர்க்கத் தயார் . முதலில் சுய விமர்சனத்தை ஆரம்பியுங்கள். குஜராத் , ராம் ஜென்ம பூமி ,பாரத ரத யாத்திரை etc.. –ம் தொடருங்கள் . கையோடு இப்போது யார் உங்கள் முதல் எதிரி ( நாட்டைச் சீரழிப்பதில் ) என்று அடையாளம் காட்டுங்கள் . புரியும் குற்றங்களைப் பட்டியலிடுங்கள் . உங்கள் மனக் குரலை நிப்பாட்டிவிட்டு சட்டரீதியிலேயே உரையாடலைத் தொடருங்கள் .   காத்திருக்கிறோம்.

க.செ

22-3-2016

பி.கு ;

[ ஆணவக்கொலைக்கு தன்னகங்காரம் மட்டுமல்ல . அன்னியரின் சொல்லாடலும் அன்னியரும் சுயத்தைக் கட்ட மிக முக்கியம் . அது பிரதானமாக ஒரு சமூக அடையாளத்தை நிறுவ அத்தியாவசியம் . இந்த அத்தியாவசியமே , இதரரின் கேலி , எகத்தாளத்தைக் கண்டே , பிரதானமாக ஆணவக்கொலையில் ஈடுபடுகின்றனர் . சுய சாதிக் கௌரவமும் , பிற சாதியிடம் கிடைக்கப்போகும் சுயத்தின் அடையாளமும் எலும்புக் குருத்தில் அச்சமேற்படுத்துகிறது . இந்தக் கருத்தாடல் வெளிப்படையாய் கட்டுடைக்கப்படவில்லை . இது லெக்கானியம் ].